अन्तरिम सरकारकी प्रधानमन्त्री सुशीला कार्कीको स्वागतमा सिंहदरबारमा फेरि उही पट्यारलाग्दो दृश्य देखिएको छ।

प्रधानमन्त्री कार्कीको पदबहालीका क्रममा निजामती कर्मचारीहरूको उही पुरानै चाकडी र चाप्लुसी शैली देखिएको छ। उही प्रक्रिया र शैलीले जेन–जी नै निरुत्साहित देखिएका छन्।

जेन–जी पुस्ताले जुन उद्धेश्यले विद्रोह गरी सत्ताबाट पुराना दलहरूलाई बिदा गरेका थिए, निजामती कर्मचारीहरूले प्रधानमन्त्री कार्कीको पदबहाली र स्वागतमा सोही रबैया देखाएका छन्।

उही तामझामसहित हातमा फूलगुच्छा बोकेर स्वागतका लागि लाइन लागेका कर्मचारीहरू, पट्यारलाग्दो र अनावश्यक रुपमा कर्मचारीहरूको परिचय प्रक्रिया देख्दा जेन–जीहरू दिक्दार छन्।

जेन–जीहरू भन्न लागेका छन्, ‘उही पुरानै रवाफ देखाउने भए यत्रो विद्रोहको जरुरत किन थियो?’

पदबहालीमा देखिएको लामो प्रक्रिया र तामझाम देख्दा लाग्छ निजामती कर्मचारीहरूमा चाकडीको पुरानो शैली सकिएको छैन। जेन–जी भन्छन्, ‘सरकार त फेरियो, अब निजामती संरचनाकै पुनर्गठन गर्नुपर्ने देखियो। नेताहरूलाई बिगार्न कर्मचारीकै हात देखिन्छ।’