नेपाली कांग्रेसका महान्त्री गगनकुमार थापाले भदौ २३ गतेको आन्दोलनमा व्यापक दमन भएको स्वीकार गर्दै घटनाको छानबिनको माग गरेका छन्।

शनिबार सामाजिक सञ्जालमार्फत सन्देश जारी गर्दै उनले जेन–जी आन्दोलनमा दमन गर्ने दोषीले सजाय पाउनुपर्ने बताए।

उनले २३ गतेको दमन र २४ गतेको घुसपैठ दुवैको छानबिन गरिनुपर्ने बताएका छन्।

‘२४ गतेको आन्दोलनमा एकातिर युवाको आक्रोश र परिवर्तनको पवित्र चाहना थियो त्यो एउटा पाटो भयो। तर, सँगसँगै कसैले यसैको मौका छोपेर प्रतिशोध साँध्ने काम भएको छ। व्यापक घुसपैठ भएको छ। कतिपय नयाँ पुराना पार्टीका मान्छेहरू संलग्न भएको भेटिएको छ,’ उनले भने।

थापाले जेन–जी पुस्ताको आन्दोलनले उठाएका न्यायपूर्ण मागहरूलाई पूरा गर्न सक्ने सबल पार्टी निर्माणको लागि पार्टी रूपान्तरण अनिवार्य सर्त भएको र कांग्रेसमा रुपान्तरण थाल्ने भनेका छन्।