पूर्वराष्ट्रपति विद्यादेवी भण्डारीले मंगलबार जिल्ला प्रशासन कार्यालय काठमाडौंमा पुगेर नागरिकताको प्रतिलिपि लिएकी छन्।

जेनजी आन्दोलनका क्रममा घरमा आगजनी गरिँदा नागरिकतालगायत सबै कागजातहरू जलेपछि भण्डारीले नागरिकता प्रतिलिपि लिएकी हुन्।

त्यसक्रममा उनले सञ्चारकर्मीहरूसँग कुरा गर्दै उनले राजनीतिक दलहरू सुसङ्गठित भएर अघि बढ्नुपर्ने बताइन्। उनले पार्टीभित्रका मतभेदहरू भए अन्तरसंघर्षबाटै समाधान गरेर अघि बढ्नुपर्ने र राष्ट्रको शान्तिका लागि पनि राजनीतिक दलहरू एक हुनुपर्ने बताइन्।

उनले भनिन्, ‘मैले नागरिकताको प्रतिलिपि निकालेको हो। २४ भदौमा सबै जले। यो दोस्रो पटक निकालेको प्रतिलिपि हो।’

उनले थपिन्, ‘चुनावी वातारण बनाउन सरकार लाग्नुपर्छ। पार्टीहरू टुट्नु फुट्नु राम्रो कुरा होइन, पार्टीहरू सुसङ्गठित भएर पार्टीभित्र केही मतभेद छ भने अन्तरसंघर्ष गरेर अघि बढ्नुपर्छ। राष्ट्रको शान्तिका लागि पनि पार्टीहरू पनि सुदृढ हुने र अन्तरसंवाद गरेर अघि बढ्ने, मतभेदहरू पार्टीभित्रै समाधान गरेर अघि बढ्नु राम्रो हो।’