सुदूरपश्चिम रोयल्स नेपाल प्रिमियर लिग (एनपीएल) सिजन–२ को फाइनलमा प्रवेश गरेको छ।

आज भएको पहिलो क्वालिफायरमा विराटनगर किंग्सलाई ७७ रनले हराउँदै सुदूरपश्चिम फाइनलमा पुगेको हो।

सुदूरपश्चिमले दिएको १५६ रनको लक्ष्य पछ्याएको विराटनगर १४ ओभर एक बलमा ७८ रनमा समेटियो।

विराटनगरका लागि ओपनर फाफ डु प्लेसिसले सर्वाधिक ३६ रन बनाए। मार्चन्ट डि लिङ १५ र बसिर अहमद १२ रन बनाउँदा अन्य ब्याटरले दोहोरो अंकमा रन बनाउन सकेनन्।

बलिङमा सुदूरपश्चिमका हर्मित सिंह, अभिनास बोहरा र स्कट कुगेइलेन दुई-दुई विकेट लिए।

त्यसअघि टस हारेर ब्याटिङ गरेको सुदूरपश्चिमले निर्धारित २० ओभरमा ७ विकेट गुमाउँदै १५५ रन बनाएको थियो।

सुदूरपश्चिमका लागि ओपनर विनोद भण्डारीले सर्वाधिक ६३ रन बनाए। त्यस्तै शेल्डन ज्याकसन र आरिफ शेखले समान २० रन बनाए।

बलिङमा विराटनगरका मार्चन्ट डि लिङ र प्रतिश जिसीले दुई-दुई विकेट लिए।

सुदूरपश्चिमसँग हारेको विराटनगरले फाइनल पुग्नका लागि दोस्रो क्वालिफायरमा काठमाडौं गोर्खाज र लुम्बिनी लायन्सबीचको विजेतासँग खेल्नेछ।