काठमाडौं । पार्टी एकताको एक वर्ष पूरा नहुँदै नेपाल कम्युनिस्ट पार्टी (नेकपा) मा वैचारिक संघर्ष चुलिएको छ । रहस्यमय दासढुंगा दुर्घटनामा ज्यान गुमाएका तत्कालीन नेकपा एमालेका महासचिव मदन भण्डारी र संगठन विभाग प्रमुख जीवराज आश्रितको २६ औँ स्मृति दिवसका दिन अध्यक्ष पुष्पकमल दाहाल ‘प्रचण्ड’ले जनताको बहुदलीय जनवाद दोहोर्‍याएर बसिरहन नहुने र अघि बढ्नुपर्ने तर्क गरेपछि नेकपाभित्र भण्डारीको विचार संकटासन्न अवस्थामा पुगेको होे ।

“मार्क्सवादलाई जीवित आत्मा पनि भनिन्छ । त्यसैलाई मध्यनजर गरेर मदन भण्डारीले विकास गर्नुभएको विचारलाई अझ परिमार्जन गर्ने, नयाँ परिस्थिति अनुसार त्यसलाई विकसित गर्ने र अहिलेका चुनौती सामना गर्नेगरी, त्यसलाई अघि बढाउने कि ?,” उनको प्रश्न थियो, “जे कुरा मदन भण्डारीले गर्नुभएन हामी त्यही गरेर बस्ने ?”