बृहत अन्तराष्ट्रिय स्तरको बिल्डटे्क एक्स्पो शुक्रबारबाट भक्तपुरमा सुरु भएको छ । 

निर्माण व्यवसायीहरुको छाता संगठन नेपाल निर्माण व्यवसायी महासंघको आयोजना र भौतिक पूर्वाधार तथा यातायात मन्त्रालय, निर्माण व्यवसाय विकास परिषद् र इन्नो रेग इण्डियाको संयुक्त आयोजनामा एक्स्पो आयोजना गरिएको हो ।  भक्तपुरको सल्लाघारीमा करिब ७० हजार स्क्वायर फिटको क्षेत्रफलमा आयोजना गरिएको एक्स्पोको उद्घाटन उपप्रधान तथा रक्षामन्त्री ईश्वर पोखरेलले गरे । 

उद्घाटन कार्यक्रममा पोखरेलले मुलुक निर्माणको साझा संकल्प पुरा गर्न सबै पक्ष मिलेर अघि बढ्नुपर्ने बताए । उनले निर्धारित समयमा नै आयोजना सम्पन्न हुन नसक्नु चिन्ताको बिषय बनेको भन्दै निर्माण व्यवसायी र सरकार मिलेर यस्ता समस्याको समाधान खोज्नुपर्ने बताए । 

त्यस्तै नेपाल उद्योग वाणिज्य महासंघका उपाध्यक्ष चन्द्रप्रसाद ढकालले नेपालमा राजनीतिक परिवर्तनपछिको हालको समयमा सबै नेपालीले चाहेको विषय भनेको आर्थिक समृद्धि नै भएको र त्यसका लागि आवश्यक पहिलो खुड्किलो भनेको पूर्वाधार निर्माण भएको बताए।

महासंघको २१ औं राधारणसभाका अबसरमा आयोजित उक्त एक्स्पो माघ ३ गतेदेखि माघ ५ गतेसम्म चल्ने छ ।  तीन दिनसम्म चल्ने सो बिल्डटेक एक्स्पोमा करिब ५ हजार अबलोकनकर्ताहरुले प्रदर्शनीको अवलोकन गर्ने आयोजक महासघंले जनाएको छ ।