पाकिस्तानी क्रिकेट टिमले यसै महिना इंग्ल्याण्डको भ्रमण गर्दैछ। यसका लागि पाकिस्तानी खेलाडी अभ्यासमा जुटिरहेको बेला पाकिस्तान क्रिकेट बोर्डले खेलाडीको कोरोना भाइरस टेस्ट पनि गरेको छ। आइतबार रावलपिण्डी रंगशालामा ५ खेलाडीको कोरोना टेस्ट सम्पन्न भएको पाकिस्तानी अखबारले जानकारी दिएका छन्। 

२४ जुनमा लाहौरमा सबै खेलाडी एकजुट हुँदैछन्, जहाँबाट टिम केही समयपछि म्यानचेस्टरतर्फ लाग्ने छ। यसअघि सबै खेलाडी तथा भ्रमण दलका सदस्यहरूको कोरोना टेस्ट हुने बताइएको छ। आइतबार रावलपिण्डीमा हारिस रउफ, उस्मान सिनवारी, हैदर अली, सादाब खान र इमाद वसिमको कोरोना टेस्ट भएको थियो। बाँकी खेलाडीको २२ जुनमा लाहौर, कराची र पेशावरमा हुने बताइएको छ। 

बोर्डले परीक्षणको रिपोर्ट २५ जुनमा आइपुग्ने र पोजिटिभ भएका खेलाडीलाई घर फकाउने बताएको छ। बोर्डले कोरोना टेस्ट दुई पल्ट हुने स्पष्ट पारेको छ।