गत माघ ६ गते झापा शनिश्चरेका मानबहादुर कार्की आफूले दैनिक खाने औषधि लिन शनिश्चरे अस्पतालमा रहेको एउटा फार्मेसीमा गए।

उनले स्वास्थ्य बीमा कार्यक्रममा समावेश भएर त्यही कार्यक्रमअन्तर्गतका औषधि लिएर खाने गरेका छन्।

उनको रगतमा बढेको कोलेस्ट्रोल घटाउन प्रति १० गोलीको भारतीय रुपैयाँ २० रुपैयाँ ८५ पैसा पर्ने २० मिलिग्रामको 'एटोरभास्टाटिन' औषधि दिइयो।

तर उनको बिलमा भने प्रतिगोटा नेपाली २० रुपैयाँ ६० पैसा चढाइयो। 

यो घटना उनका लागि नौलो होइन। उनले जहिले जहिले औषधि ल्याउँछन्, बीमाको मूल्यभन्दा कम मूल्यको औषधि पाउँछन्।

अर्जुनधारा-८ की ७० वर्षीय गीतादेवी बुढाथोकीले त्यही १० मिलिग्रामको 'एटोरभास्टाटिन' औषधि बीमामार्फत् सोही फार्मेसीबाट ल्याइन्।

• कोरोनाभाइरसको बीमामा किन भइरहेको छैन सहज भुक्तानी

उनले पाएको औषधिको मूल्य प्रति १० गोलीको भारतीय रुपैयाँ २४ रुपैयाँ ११ पैसा औषधिको पत्तामा उल्लेख छ। तर बीमाको बिलमा भने प्रतिगोली नेपाली रुपैयाँ १० रुपैयाँ ७७ पैसा लेखिएको छ।

स्वास्थ्य बीमा कार्यक्रममार्फत् नै झापाको बिर्तामोडमा रहेको कन्काई अस्पतालमा उपचार गराइरहेकी मैनादेवी रिजालले माघ ७ गते औषधि खरिद गर्दा २० मिलिग्रामको 'रोजुभास्टाटिन' औषधि प्रति १० गोली भारतीय रुपैयाँ १९० रुपैयाँ ८४ पैसाको पाइन्।