गाजा सहरमा सहायताको प्रतीक्षामा रहेका विस्थापित प्यालेस्टिनी भेला भएको स्थानमा इजरायलले गरेको आक्रमणमा कम्तीमा २१ प्यालेस्टिनीको मृत्यु भएको प्यालेस्टिनी स्वास्थ्य मन्त्रालयले जनाएको छ।

उक्त घटनामा थप एक सय ५० जना घाइते भएका प्रत्यक्षदर्शीले बताएका छन्। प्यालेस्टिनीहरूको एउटा समूह सहयोग प्राप्त गर्न भेला भएको स्थानमा हेलिकाेप्टरबाट मेसिनगनद्वारा आक्रमण भएको स्थानीयले बताएका छन्।

घटनास्थलको अवस्था चुनौतीपूर्ण भए पनि मृतकलाई उद्धार गर्ने र घाइतेलाई निकाल्ने प्रयास जारी रहेको विज्ञप्तिमा उल्लेख छ। घाइतेमध्ये केही गम्भीर अवस्थामा रहेका कारण मृतकको संख्या थप बढ्ने अनुमान गरिएको छ।

इजरायली प्रतिरक्षा बल (आइडिएफ)ले भने दक्षिणी गाजामा प्यालेस्टिनीहरूलाई लक्षित गरी आफ्नो सेनाले सशस्त्र कारबाही गरेको भन्ने समाचारको खण्डन गरेको छ।