संघीय संसदका विपक्षी दलले बहुमत सरकारलाई अल्पमतको कदर गर्न आग्रह गरेका छन्।

शुक्रबार संघीय संसद भवन नयाँ बानेश्वरमा बसेको विपक्षी दलहरूको बैठकपछि आयोजित संयुक्त पत्रकार पत्रकार सम्मेलनमा बैठकको निर्णय सार्वजनिक गर्दै माओवादी अध्यक्ष पुष्पकमल दाहाल प्रचण्डले संसदीय प्रणालीमा बहुमतले अल्पमतको कदर गर्नु पर्ने बताएका हुन्।

उनले भने, ‘सरकार टिकाउन बहुमत छ भन्दै राज्यका निकायहरूलाई आफू अनुकूल दुरूपयोग गर्ने, संसद छल्ने र राजनीतिक निर्णय तथा काम कारवाहीहरू पूर्वाग्रही ढङ्गले गर्दै जाने प्रवृत्तिले अन्ततः लोकतन्त्र र विधिको शासनमाथि नै संकट ल्याउने हाम्रो ठहर छ।’

प्रतिपक्षी दलहरूले संसदको मर्यादा र गरिमाको सम्मान गर्दै तत्काल संसदको हिउँदे अधिवेशन आह्वान गर्न सरकारसमक्ष माग गरेको छ। सरकारले तत्काल हिउँदे अधिवेशन आह्वानको प्रक्रिया थालनी नगरे विशेष अधिवेशनको माग गर्ने उनले बताए।

उनले भने, ‘स्वेच्छाचारी र जनविरोधी काम निरन्तर जारी राखेमा हामी कडा संघर्षमा उत्रिने चेतावनी समेत दिन चाहन्छौँ।’