कोशी प्रदेशसभाका सभामुख अम्बरबहादुर विष्टले पार्टीकाे जिम्मेवारीबाट अलग भएको घोषणा गरेका छन्।

प्रदेश सभामुखमा निर्वाचित भएपछि विष्टले राष्ट्रिय प्रजातन्त्र पार्टी (राप्रपा)को जिम्मेवारीबाट अलग भएको घोषणा गरेका हुन्।

उनले सभामुख रहुन्जेल पार्टीको कुनै पनि पदमा बस्न नमिल्ने भएकोले पार्टीको सबै पदीय जिम्मेवारीबाट अलग भएकाे उल्लेख गरेका छन्।

‘म झापा गौराहद-७ निवासी अम्बर व. विष्ट रा.प्र.पा. को स्थापना कालदेखि नै सदस्य भै हाल पार्टीको केन्द्रीय सदस्यको रूपमा रही रहेको अवस्थामा पार्टीले कोशी प्रदेश सभाको सदस्यको रुपमा निर्वाचित गराएकोमा हार्दिक आभार व्यक्त गर्दछु, उनले भनेका छन्, ‘मिति २०८०/०९/२४ गते कोशी प्रदेश सभाले मलाई सभामुखको रूपमा निर्वाचित गराएकोले पदिय मर्यादा कायम राख्दै सो पदमा रहुन्जेल पार्टीको कुनै पनि पदमा बस्न नमिल्ने भएकोले पार्टीको सबै पदिय जिम्मेवारीबाट अलग रहेको व्यहोरा निवेदन गर्दछु।’