क्रिकेट खेल जति रोचक मानिन्छ। त्यति नै रोचक छ, यसको इतिहास पनि। बेलायतबाट सुरु भएको क्रिकेटले अहिले विश्वब्यापी रुप लिइसकेको छ। अहिले क्रिकेट खेल फुटबलपछि दोस्रो लोकप्रिय खेल भएको दावी विश्व क्रिकेट महासंघ (आइसिसी) ले गर्दै आइरहेको छ। 

युद्धग्रस्त अफगानिस्तान होस् वा नेपाल, दुबै देशमा यसको लोकप्रियता उत्तिकै छ। यसपालि एकदिवसीय क्रिकेटको विश्व कप मे ३० देखि इङ्ल्यान्ड र वेल्सको संयुक्त आयोजनामा हुँदैछ। यसै सन्दर्भमा ब्रेक एन लिंक्सले क्रिकेटको इतिहाससँग जोडिएका केही तथ्यलाई प्रस्तुत गरेको छ।

सिलाइयुक्त बल
अन्तर्राष्ट्रिय क्रिकेट हुनुपूर्व सिलाइयुक्त बलको प्रयोग पहिलो पल्ट केन्ट (इङ्ल्याण्ड) का ड्युक परिवारले सन् १५६१ मा गरेका थिए। त्यसको करिब २ सय बर्षपछि सन् १७७५ मा केन्टकै स्थानीय क्रिकेटरले यसलाई प्रयोगमा ल्याए । बल सिलाउने काम स्थानीय मानिसले नै गर्थे । पछिमात्र बल सिलाउन मेसिन प्रयोग हुन थाल्यो ।

तीनवटा स्टम्प
इङ्ल्याण्डमा सन् १८१० देखि नै स्थानीयस्तरमा तीनवटा स्टम्प राख्ने प्रचलन सुरु भइसकेको थियो । तर, यसको प्रयोग सन् १८७६ देखिमात्र भयो । यतिबेलासम्म स्टम्पमाथि बेल्स राख्ने चलन थिएन । धेरै पछि मात्र स्टम्पमाथि बेल्स राख्ने चलन आएको हो ।

पहिलो स्कोर बुक
क्रिकेटमा खेलाडीको प्रदर्शनको गणना गर्ने चलन सन् १७७६ देखि सुरु भएको हो । इङ्ल्याण्डको सेबनोक क्लबका स्कोरर प्रिटले पहिलो पल्ल्ट स्कोर बुक प्रकाशित गराएका थिए ।

एघार खेलाडी
क्रिकेटमा ११ खेलाडी राख्ने चलन सन् १८८४ मा सुरु भएको थियो । इङ्ल्याण्डमै प्रथम श्रेणी खेलमार्फत एउटा टिममा एघार खेलाडी मात्र खेलाउन पाउने नियम लागु गरिएको थियो । १८८४ अघि इङ्ल्याण्डमा स्थानीयस्तरमा क्रिकेट हुँदा जति पनि खेलाडी मैदानमा उत्रिन्थे ।

एलबिडब्लु
लेग बिफर विकेट (एलबिडब्लु) को नियम सन् १७४४ देखि लागु भएको थियो । यसअघि हुने खेलमा आउटबाट जोगिन इङ्ल्याण्डका स्थानीय खेलाडीले खुट्टाले बल रोक्थे, जसका कारण थुप्रै विवाद निम्तिन्थ्यो ।