सोनी शाही
केही दिनयता देशभर कोरोना संक्रमण दर घट्दो छ। निको हुनेको संख्या क्रमशः बढिरहेको छ।
कोरोना संक्रमणबाट निको भइसकेपछि पनि कतिपय मानिसमा पोस्ट कोभिड वा लङ कोभिडको लक्षण देखिन थालेको विज्ञहरू बताउँछन्।
कोरोना संक्रमण निको भइसकेपछि पनि स्वास्थ्यमा निरन्तर विभिन्न समस्या आउनुलाई नै पोस्ट कोभिड भनिने संक्रामक रोग विशेषज्ञ डा. शेरबहादुर पुन बताउँछन्।
उनका अनुसार कोरोनाको पहिलो लहरपछि संक्रमणबाट निको भएका कतिपय मानिसमा पोस्ट कोभिडको समस्या देखिएको थियो भने दोस्रो लहरमा यो अझ बढेको छ।
‘कोरोना संक्रमणबाट निको भइसकेपछि पनि मानसिकदेखि शरीरका विभिन्न अंगमा समस्या देखिनुलाई पोस्ट कोभिड भनिन्छ। त्यस्तो समस्या महिनौँसम्म रहन सक्ने सम्भावना हुन्छ,’ उनले भने। नेचर जर्नलमा प्रकाशित लेखअनुसार अमेरिकामा लगभग ३२ प्रतिशतको हाराहारीमा पोस्ट कोभिडका बिरामी देखिएका छन्।
