प्रधानमन्त्री पुष्पकमल दाहाल ‘प्रचण्ड’ नेतृत्वको मन्त्रीमण्डलमा सबैभन्दा धनी मन्त्रीका रुपमा राष्ट्रिय स्वतन्त्र पार्टी (रास्वपा)का सांसद डोलप्रसाद अर्याल (डिपी अर्याल) देखिएका छन्। उनीसँग ४ करोड बढीको ठाउँठाउँमा जग्गा र २ करोड बढी नगद नै देखिएको छ। 

उनको निजी कमाइबाट किनेको काठमाडौँ महानगरपालिका– १६ मा २८७ वर्ग किलोमिटरमा फैलिएको घर रहेको छ। जसको लागत ३ करोड रुपैयाँ छ। घर भने श्रीमती अम्बिका केसीको नाममा रहेको सम्पत्ति विवरणमा उल्लेख छ।

अर्यालको धादिङ, लमजुङ, काठमाडौँ र भक्तपुरमा गरी १२ वटा कित्तामा जग्गा रहेको छ। श्रीमतीको नाममा धादिङ र काठमाडौंका ५ स्थानमा विभिन्न कित्ताका जग्गाहरू रहेको छ। मन्त्री अर्यालको नाममा लमजुङका विभिन्न ६ स्थानमा जग्गा रहेको छ। अन्य ६ ठाउँका मन्त्री अर्यालकै नाममा रहेको छ। जुन निजी व्यापारबाट जोडेको विवरणमा उल्लेख छ। 

त्यस्तै मन्त्री अर्यालसँग १५० तोला सुन, १०० तोला चाँदी र १० तोला हिरा रहेको छ। उक्त सुन व्यापारबाट जोडेको उल्लेख छ। त्यस्तै मन्त्री अर्याल र श्रीमतीका नाममा गरेर विभिन्न ७ वटा बैंकमा  २ करोड बढी नगद मौज्दात रहेको छ। 

त्यस्तै मन्त्री अर्यालसँग व्यापारबाट आर्जन गरेका ६ वटा कम्पनीरसंस्थाका सेयर रहेको विवरणमा उल्लेख छ। उक्त कित्ता २ हजारदेखि ३५ हजारसम्म रहेको विवरणमा उल्लेख छ।

त्यस्तै मन्त्री अर्यालसँग टोयटा प्राडो र टाटाको नेक्सन इभी कार रहेको विवरणमा उल्लेख छ। उनले निजी कमाइबाट ब्यांकेटदेखि टूर एन्ड ट्राभल्स, रेमिटलगायत जोडेका छन्।

मन्त्री अर्यालले लिएको साढे २ करोड ऋणमध्ये एक करोड चुक्ता गरेका छन् भने डेढ करोड ऋण दिएको विवरणमा उल्लेख छ।

प्रचण्ड नेतृत्वमा सबैभन्दा कम सम्पत्ति भएको मन्त्रीमा नारायणकाजी श्रेष्ठ छन्। उनको गोरखाको सिराञ्चोक ८ मा ३ कित्तामा जमिन छ। तर त्यस जमिन पनि पार्टीलाई दिने घोषणा गरिएको र दिने प्रकृयामा रहेको श्रेष्ठले उल्लेख गरेका छन्। 

उनीसँग १ लाख २२ हजार ९१८ रुपैयाँ ६४ पैसा रहेको छ। एउटा गाडी चलाइरहेको र त्यो पनि पार्टी अध्यक्ष प्रचण्डले दिएको सम्पत्ति विवरण उल्लेख गरेका छन्।