मुगुको छायाँनाथ रारा नगरपालिका-१२ लुम्स गाउँमा मंगलबार जग्गा विवादमा झगडा हुँदा देउरानीको बाउसो प्रहारबाट घाइते भएकी जेठानीको मृत्यु भएको छ।

गम्भीर घाइते भएकी दुर्गा ऐडीको कर्णाली स्वास्थ्य विज्ञान प्रतिष्ठान जुम्लामा उपचारका क्रममा ५ दिनपछि शनिबार बिहान ५ बजे मृत्यु भएको हो।

लुम्स गाउँकी बिमला बुढाले जेठानी दुर्गा ऐडीको टाउकोमा घरेलु औजार बाउसो प्रयोग गरी घाइते बनाएको प्रहरीले जनाएको छ।

देउरानीको बाउसो प्रहारबाट जेठानी गम्भीर घाइते भएकी थिइन्। घाइते दुर्गा ऐडीको टाउँको र अनुहारमा गहिरो चोट लागेको थियो।

ससुरा बाचुराम ऐडीका अनुसार कुनिउखात भन्ने स्थानको जग्गा ३ भाइमध्ये कसैलाई भागबण्डा नगरिएको र त्यही जग्गा देउरानी र जेठानीको ‘मेरो भागमा हुनुपर्छ’ भन्ने विवादले तनाव बढेको थियो।

त्यही विवादका कारण झगडा हुँदैगर्दा देउरानी २५ वर्षकी बिमलाले ३६ वर्षकी जेठानी दुर्गालाई घरेलु औजार बाउसो प्रहार गरेर घाइते बनाएको ससुरा बाचुरामले बताए।

झगडाको मुख्य कारण नै जग्गा विवाद भएको जिल्ला प्रहरी कार्यालय मुगुले जनाएको छ।

आक्रमणमा संलग्न बिमलालाई पक्राउ गरी ६ दिन म्याद थप गरी अनुसन्धान थालिएको जिल्ला प्रहरी कार्यालय मुगुले जनाएको छ।