गायक राजेशपायल राई र पूर्वपत्नी साङबुङ राईबीच प्रहरीमा मिलापत्र भएको छ। 

पूर्वपति गायकले दुर्व्यहार गरेको भन्दै उजुरी लिएर साङबुङ प्रहरी वृत्त तीनकुने पुगेकी थिइन्। प्रहरीमा उजुरी दर्ता नगरी उनीहरूबीच आइतबार मिलापत्र भएको तीनकुने वृत्तका डीएसपी हरि खतिवडाले बताए। 

साङबुङले पूर्वपतिलाई प्रहरी कार्यालय झिकाएर आफूमाथि जीउज्यानको खतरा नहुने सुनिश्चित गराउन माग गरेपछि प्रहरीले गायक राईलाई बोलाएर छलफल गराएको हो।

छलफलपछि उनीहरूबीच झै-झगडा गनगर्ने र अब एक-अर्काको जीवनमा हस्तक्षेप नगर्ने सहमति भएको छ। 

राजेशपायल र साङबुङका तर्फबाट एक नाबालक छोरा छन्। उनीहरूबीच छोराको विषयमा विवाद हुने गरेको छ। छोरा साङबुङले राखेकी छन् भने खर्च गायक राईले तिर्छन्।

बेलाबेला छोरा लिन दुवैजना एकअर्काको घरमा आउने जाने गर्छन्। सोहीबेला उनीहरूबीच विवाद हुने गरेको छ। 

आइतबार प्रहरीमा भएको सहमतिअनुसार अब दुवैजना एकअर्काको घरमा आवतजावत गर्ने छैनन्। छोरालाई एकअर्काको घरमा ल्याउँदा वा लिन जाँदा परिवारका सदस्यलाई पठाउने सहमति भएको प्रहरीले जनाएको छ।