नेपाली कांग्रेसका शीर्ष नेताहरु आकस्मिक छलफलमा जुटेका छन्।

अख्तियार दुरुपयोग अनुसन्धान आयोगले बुधबार बालुवाटारस्थित ललितानिवासको जग्गा प्रकरणमा उपसभापति विजयकुमार गच्छदारसहित १ सय ७५ जनालाई भ्रष्टाचार मुद्दा दायर गरेपछि बिहीबार कांग्रेस नेताहरु छलफलमा जुटेका हुन्। 

छलफल पार्टी सभापति शेरबहादुर देउवा निवास बुढानिलकण्ठमा चलिरहेको कांग्रेस पार्टी कार्यालयका सचिव कृष्ण पौडेलले बताए।

तत्कालिन भौतिक योजनामन्त्री विजयकुमार गच्छदारलाई मुद्दा दायर गर्दै अख्तियारले ९ करोड ६९ लाख विगो माग गरेको छ। 

अख्तियारले सार्वजनिक जग्गा हिनामिना गरेको अभियोगसहित उच्चपदस्थ पदाधिकारीलाई बिगोको अनुपातमा जरिवाना र १० वर्षसम्म जेल सजाय माग गरेको छ। राष्ट्रसेवकका हकमा भ्रष्टाचार निवारण ऐनअनुरूप थप तीन वर्ष जेल सजाय माग गरिएको अख्तियारका प्रवक्ता एवं सहसचिव प्रदीपकुमार कोइरालाले बताए।