पाकिस्तानमा तय भएकाे एसिया कप टि–२० क्रिकेट प्रतियोगिता २०२० रद्द हुने भएको छ।
स्पोर्ट्स टक कार्यक्रममा बुधबार बोल्दै भारतीय क्रिकेट नियन्त्रण बोर्ड (बीसीसीआई) का अध्यक्ष सौरभ गांगुलीले एसिया कप टि-२० क्रिकेट रद्द हुने बताएका हुन्।
एसिया कप २०२० आगमी सेप्टेम्बरमा पाकिस्तानमा खेल्ने कार्यतालिका थियो। एसिया कप टि-२० प्रतियोगितामा भारत, पाकिस्ता, श्रीलंका, बंगलादेश, अफगानिस्तान र एक छनोट भएर आउने टोलीबीच प्रतिस्पर्धा हुने तय थियो।
नेपाल भने एसिया कप यात्राको पहिलो चरणबाटै बाहिरिसकेको थियो।
गत फागुनमा थाईल्यान्डमा भएको एसिसी इस्टर्न रिजन टि-२० क्रिकेट प्रतियोगितामा खराब प्रर्दशन गर्दै चौथो स्थानमा रहेर नेपाल बाहिरिएको थियो।
गांगुलीले बिहीबार बस्ने एसियन क्रिकेट काउन्सिल (एसिसी)को बैठकले याे कुरा सार्वजनिक गर्ने बताएका छन्। गांगुलीले प्रतियोगिता रद्द हुने बताएपनि एसियन क्रिकेट काउन्सिल (एसीसी) ले केहि बताएको छैन।
कोरोनाको महामारी कायम रहेपछि प्रतियोगिता अन्योलमा रहेको छ। यस्तै पाकिस्तानमा आयोजना भए भारतले नखेल्ने बताएको छ।
