नेपालको सुन्दर भौगोलिक संरचना, प्राकृतिक छटा तथा विविधतामा जलवायु परिवर्तनको असर गहिरो गरी परेको छ । यहाँका हिमनदीहरू तीव्र गतिमा पग्लिरहेका छन्, अनियमित वर्षा र मौसमको परिवर्तनले जीवनको आधारभूत संरचनामा विकृति ल्याएको छ ।

नेपालका उच्च हिमाली क्षेत्रबाट तापक्रमको वृद्धिले बाढी र पहिरोको घटनालाई तीव्र बनाएको छ, जसले लाखौँ मानिसहरूको जीविका र सुरक्षा जोखिममा पारेको छ ।

विशेष गरी, तराई क्षेत्रका किसानहरूलाई बारम्बार आउने बाढी र सुख्खा समस्याले कृषिमा ठूलो गिरावट ल्याएको छ, जुन नेपालको अर्थतन्त्रको मेरुदण्ड हो । अब जलवायु महासंकटमा परेको छ । नेपालको कृषि क्षेत्रमा जलवायु परिवर्तनले खाद्यान्न उत्पादनमा ठूलो गिरावट ल्याएको छ । धान, मकै, र गहुँ जस्ता प्रमुख बालीहरूमा कमी आएको छ, जसले खाद्य सुरक्षामा गम्भीर समस्या ल्याएको छ । जलवायु परिवर्तनका कारण असामान्य मौसमी परिवर्तन र बाढीका कारण किसानहरूका बाली नष्ट भएका छन् । यसले खाद्य संकट उत्पन्न गरेको छ ।