मोरङको मिक्लाजुङ–४ हात्तीमारा सिरानका २३ वर्षीय रोहित तामाङ फागुन ९ देखि एउटा रुखको टोड्कामा ध्यान गरेर बसिरहेका छन्।

घरबाट पूर्वोत्तरमा रहेको विशाल मैनाको रुखमुनि उनी ध्यानमग्न छन्। रुखको तल्लो भागमा आगो लागेर ठूलो टोड्को परेको छ। त्यही टोड्काभित्र गौतम बुद्धको तस्बिर राखेर उनी तपस्यामा छन्।

रोहितका साथी निशान राईका अनुसार शनिबार बिहान ६ बजे स्थानीय पुग्दा रोहित ध्यानमा थिए। उनी स्थिर रूपमा ध्यानमग्न भेटिका थिए।

घरमा भाइसँग बस्दै आएका रोहितकी आमाले दोस्रो विवाह गरेकी छिन् भने भने बाबु लोकबहादुर कान्छी श्रीमाती लिएर बसेका छन्।

अविवाहित रोहितले कक्षा १० सम्म अध्ययन गरेका छन्। रोहित गत माघ १० देखि एकाएक आफूलाई ‘आध्यात्म’मा लगाएको उनका भाइ लबिन तामाङले बताए। भाइ लबिनका अनुसार रोहितले माघ १० देखि आफन्त, साथीभाइ सबैलाई तपाईं भन्न थाले।

कोहीसँग ठट्टा नगर्ने, धेरै नबोल्ने, चाहिएको मात्र बोल्न थालेका उनले बौद्ध धर्मको अनुयायी बनेर २७ औँ धर्मकुण्डली सफाइ गर्ने भन्दै ध्यान सुरू गरेको भाइ लबिनले बताए।

स्थानीय छिमेकी र आफन्तसमेत उनको दिनचर्या परिवर्तन भएको देखेपछि चकित भएका छन्।

मिक्लाजुङ–४ का वडाध्यक्ष विशाल राईले रोहितको दिनचर्या एकाएक परिवर्तन भएपछि समाज नै चकित परेको बताए।

‘पहिले उनी औसत मानिसजस्तै नियमित काम गर्ने, खाने गर्थे। उनमा कुनै मानसिक समस्या थिएन। शुक्रबार बेलुकीपख मैनाको विशाल रुखका हाँगा-हाँगामा केही पनि नसमाइकन हिँडेको देखेपछि हामी पनि अचम्मित भएका छौँ। त्यो रुखमा चढ्न नै गाह्रो छ। चढेर हाँगा-हाँगामा हिँड्न झन् गाह्रो छ,’ उनले भने।

स्थानीयका अनुसार रोहितले फलफूलबाहेक केही खाएका छैनन्। रुखका हाँगा-हाँगामा कुदिरहँदा लड्लान् कि भन्ने चिन्ता थपिएको स्थानीय रेखा राईले बताइन्।