प्रतिबन्धित नेत्रविक्रम चन्द ‘विप्लव’ नेत्रृत्वको नेकपाका एक नेता आइतबार सत्तारुढ नेकपामा प्रवेश गरेका छन्।
विप्लव’ समूहको जनसांस्कृतिक महासंघका केन्द्रीय सदस्य एवं सगरमाथा व्युरो संयोजक एकराज घिमिरे ‘विप्लव’ समूह परित्याग गर्दै नेकपा प्रवेश गरेका हुन्। उनलाई प्रदेश १ का मुख्यमन्त्री शेरधन राई र नेकपाका प्रदेश १ अध्यक्ष देवराज घिमिरेले खादा र अविर लगाएर स्वागत गरे। घिमिरेले मुख्यमन्त्री राईकै पहलमा आफू नेकपा प्रवेश एवं ‘विप्लव’ समूह परित्याग गर्न सहमत भएको र साहित्यिक एवं सांस्कृति आन्दोलनमार्फत मुलुकलाई समृद्ध बनाउने अभियानमा लाग्ने बताए।
पहिले आफू तत्कालिन एमालेको प्रजातान्त्रिक राष्ट्रिय युवा संघमा रहेर काम गरिरहँदा विचारमा वितृष्णा भएका कारण बाटो विराए पनि अहिले पुुरानै घरमा फर्किएको उनले बताए। स्थानीय र प्रतिनिधिसभा निर्वाचनमा आफू ४० दिन प्रहरी हिरासतमा बस्दा एकीकृत जनक्रान्तिको विकल्प छैन भन्ने लागे पनि पछिल्लो समय ‘विप्लव’ प्रति सबैको वितृष्णा बढेर गएको घिमिरेले बताए । भोजपुर घटनामा ‘विप्लव’ समूह र प्रहरी दुवैतर्फ क्षति भएपछि भने झन जनतामा वितृष्णा बढेर गएको उनको भनाइ छ ।
याे पनि पढ्नुहाेस।
पूर्व युवराज्ञीले खाेलिन् दैवी प्रकाेप उद्धार काेष।
‘ढिलो चाँडो गरेर सबैले ‘विप्लव’ परित्याग गर्छननै । गर्नै पर्ने अवस्था आउने छ,’ उनले भने, ‘अब बन्दुक र बमले मुलुक समृद्ध बन्दैन । नेपाली जनताको सपना बन्दुक बोकेर पूरा पनि हुँदैन र गर्न पनि सकिँदैन ।’ घिमिरेले ‘विप्लव’ समूहको पछिल्लो गतिविधी जनविरोधी रहेको बताए ।
कार्यक्रममा बोल्दै मुख्यमन्त्री राईले नेपाली राजनीतिको राजमार्गमा हिंड्ने बेलामा ‘विप्लव’ समूह गल्ली र गोरेटोमा अलमलिएको बताए । मुलुकलाई समृद्ध बनाउन सबै पक्ष एकजुट भएर काहीं पनि अलमल नगरिकन लागेको अवस्थामा ‘विप्लव’ समूहले पनि शान्तिपूर्ण बाटो रोज्नु उत्तम हुने उनको भनाइ छ ।
हत्या, हिंसा, गोला र बमबारुद त्यागेर शान्तिपूर्ण अवतरण गर्न बाध्य हुनै पर्ने बताउँदै राईले मुलुकको समृद्धिको लक्ष्य तय भइसकेका कारण अहिलेदेखि नै त्यसमा सहयोग गर्न ‘विप्लव’ समूहलाई आग्रह पनि गरे । ‘वार्तामा आउने र शान्तिपूर्ण अवतरण गर्ने वातावरण बनेको छैन भने हामी बनाउने छौं,’ उनले भने, ‘सबै मिलेर राष्ट्र निर्माणको महाअभियानमा जुट्नुु पर्छ ।’
नेकपा मोरङका इन्चार्ज घनेन्द्र बस्नेतले ‘विप्लव’ समूहसँग नेकपामा समाहित हुनुको विकल्प नभएको बताए । नेकपाका प्रदेश १ अध्यक्ष देवराज घिमिरेले ‘विप्लव’ समूहलाई शान्तिपूर्ण वार्तामा आएर समृद्ध मुलुक निर्माणको अभियानमा जुट्न आह्वान गरे ।
याे पनि पढ्नुहाेस।
