इंग्लिस प्रिमियर लिग फुटबलमा लिभरपुलले अपराजित यात्रा कायमै राखेको छ। 

शुक्रबार बिहान भएको खेलमा उल्भ्सलाई २–१ गोल अन्तरले पराजित गर्दै लिग लिडर लिभरपुलले अपराजित यात्रा कायमै राखेको हो। 

लिभरपुलको जितमा कप्तान जोर्डन हेन्डरसन र रोबर्टो फिर्मिन्होले गोल गरे। उल्भ्सका राउल जिमेनेजले एक गोल फर्काए।

आठौं मिनेटमा हेन्डरसनले लिभरपुललाई अग्रता दिलाएका थिए। उनले कर्नर बलमा हेडमार्फत गोल गरेका थिए।

५१ औं मिनेटमा घरेलु टोली बराबरी गोल फर्कियो। उसका लागि जिमेनेजले गोल गरे।

यस्तै फिर्मिन्होले खेल सकिन ६ मिनेट अगाडी गोल गर्दै लिभरपुललाई जित दिलाए।

जितसँगै लिभरपुलले अंक तालिकामा १६ को अग्रता लिएको छ।  लिभरपुलले लिगका पछिल्ला १४ खेलमा जित निकालेको छ। लिभरपुल प्रिमियर लिगको ४० खेलमा अपराजित रहने तेस्रो टिम बनेको छ।

शीर्ष स्थानको लिभरपुलले २३ खेलबाट ६७ अंक जोडेको छ। उल्भ्स ३४ अंक सहित सातौ स्थानमा छ।