ती पात्र हुन्– सत्तारूढ नेपाल कम्युनिस्ट पार्टी (नेकपा)का नेता वर्षमान पुन। तत्कालीन नेकपा (माओवादी)का लडाकु कमान्डरका रूपमा रोल्पाको होलेरीमा आक्रमण गर्न जााँदा उनी २४ वर्षे तन्नेरी थिए। समयले थाहै नपाई नेटो काटिरहेको हुन्छ। अंग्रेजीमा लोकप्रिय भनाइ छ– टाइम फ्लाइज लाइक एक एरो। अर्थात् काँड छुटेजस्तै गरी समय हामीलाई छाडेर अघि बढ्छ। वास्तवमा होलेरीको त्यो बेलाको आक्रमण स्मृतिबाट बिस्तारै बाहिरिँदै छ। स्वयं त्यसमा सहभागी भएकाहरूले समेत कतिपय प्रसंग बिर्सिन थालिसकेका छन्।

संयोगले यसपटक माओवादी ‘जनयुद्ध’को उद्गम थलोमध्ये एक– रोल्पाको होलेरीमा आयोजित ‘राष्ट्रिय मिडिया सम्मेलन’मा सहभागी हुने अवसर मिल्यो। ‘जनयुद्ध’ सुरु गर्दाको त्यो समयबारे त्यसकै कर्ताका मुखबाट केही सुन्ने अवसर पनि पाइयो। त्यसले हामीलाई फेरि एकपटक त्यही समयमा पुगेर स्मृतिका केस्रा केलाउन बाध्य पा-यो।