जनकपुर पुगेर गृहमन्त्रीले भनेः गलत गरेको दिनबाट राजनीतिमा देखा पर्दिनँ
भिजिट भिसा प्रकरणमा मुछिएका गृहमन्त्री रमेश लेखकले आफूले गलत काम गरेको प्रमाणित भएको दिनबाट राजनीतिमा देखा नपर्ने बताएका छन्। शनिबार धनुषा जिल्लास्थित नेपाली कांग्रेसको पार्टी कार्यालयमा कार्यकर्ताले उठाएको प्रश्नको जवाफ दिँदै गृहमन्त्री लेखकले यस विषयमा आफूले केही दिनपछि बोल्ने तर गृहमन्त्रालयले आजै विज्ञप्ति निकालेर स्पष्ट पार्ने बताए। लेखकले भने, ‘केही दिनदेखि भिजिट भिसासँग जोडेर मेरो बारेमा समाजिक संजालमा लेख्ने काम भइरहेको छ। दुई/तीन दिन किन चुप लागेर बसेका थिएँ, यो कहाँबाट, कसरी, किन भइरहेछ भन्ने खोजीराखेको थिएँ। यस विषयमा मैले धेरै कुरा थाहा पाइसकेको छु। आजै काठमाडौं पुगेपछि मेरो मन्त्रालयले विज्ञप्ति निकाल्छ र दुई/चार दिनमा आफैं पनि केही कुरा बोल्छु। अनि देशभरका साथीहरूलाई प्रष्ट हुन्छ। त्यसो हुनाले त्यतातिर अहिले धेरै बोल्दिनँ।’
बिएल संवाददाता - जनकपुरधाम
