हिमाल आरोहण गर्न बहराइनका राजकुमारसहित १८ सदस्यी टोली नेपाल आइपुगे

बहराइनबाट हिमाल आरोहण गर्न नेपाल आइपुगेका राजकुमारसहितकाे टाेली। तस्वीर: मिङ्‍मा शेर्पा

खुम्बु क्षेत्रमा पर्ने लोबुचे तथा उत्तरी गोरखाको मनास्लु हिमाल आरोहण गर्न बहराइनबाट राजपरिवारका एक सदस्यसहित १८ जनाको टोली काठमाडौं आइपुगेको छ।

यो टोली बहराइनको शेख ईशा एयरबेसबाट राति साढे १२ बजे विशेष विमानबाट नेपालका लागि प्रस्थान गरेको बहराइनस्थित नेपाली दूतावासले जनाएकाे छ।

दूतावासका अनुसार, यो टोलीमा बहराइनको डिफेन्स फोर्समा कार्यरत १५ जना बहराइनी र तीन जना बेलायती नागरिक छन्। 

त्रिभुवन अन्तर्राष्ट्रिय विमानस्थल कार्यालयका अनुसार बहराइनका राजकुमार नासिर बिन हामिद अल खलिफासहित १८ जनाको टोली ल्याएको एभ्रो विमान बुधबार बिहान ११ बजे काठमाडौं अवतरण गरेको थियो। यो टोलीलाई परराष्ट्रका अधिकारीले विमानस्थलमा स्वागत गरेका छ।

यो टोली ६ दिन गोकर्ण फरेस्ट रिसोर्टको होटल क्वारेन्टाइनमा बस्ने आरोहणको जिम्मा लिने सेभेन समिट ट्रेक्स प्रालिका अध्यक्ष मिङ्‍मा शेर्पाले बताए। 

त्यसपछि यी १८ जना काठमाडौंबाट लुक्लासम्म हेलिकप्टर र जहाजबाट जानेछन्। त्यहाँबाट लोबुचे हिमालको आधार शिविरसम्म पदायात्रा गर्नेछन्।

पर्यटन बोर्डका सीईओ धनञ्जय रेग्मीका अनुसार, यो टोलीले करिब २ महिना नेपाल बिताउने छ।

लोबुचे र मनास्लु हिमाल आरोहण गरेपछि अर्को वर्षको वसन्तकालीन यामममा सगरमाथा आरोहण गर्ने टोलीको मुख्य लक्ष्य रहेको छ। 

प्रकाशित मिति: : 2020-09-16 12:06:52

प्रतिकृया दिनुहोस्