गत शुक्रबार रुस र युक्रेनका मन्त्रीहरूले इस्तानबुलमा वार्ता गरेका थिए। तर त्यहाँ कुनै पनि सहमति भेटिएन। युद्धबिरामका बारेमा कुनै सहमति नभए पनि दुबै राष्ट्रहरू कम्तीमा एक-एक हजार युद्ध बन्दीहरू रिहा गर्न सहमत भए। रुसका राष्ट्रपति पुटिनले आफैले युक्रेनसँग सिधा वार्ता गर्ने भन्दै स्थान र समय पनि तोकेका थिए। तर अन्तिम अवस्थामा उनी वार्तामा बसेनन् र जेलेन्स्की पनि गएनन्।
बिएल संवाददाता - काठमाडौँ
प्रधानमन्त्री केपी शर्मा ओलीसँग कोप-२९ का अध्यक्ष तथा अजरबैजानका राष्ट्रपतिका जलवायु मामिला प्रतिनिधि मुख्तर बाबायेभले शिष्टाचार भेटवार्ता गरेका छन्। शनिबार प्रधानमन्त्री निवास, बालुवाटारमा भएको भेटमा प्रधानमन्त्री ओलीले विश्वव्यापी साझा मुद्धा बनेको जलवायु परिवर्तनका सवालमा आपसी सहकार्यका माध्यमबाट चुनौतीको सामना गर्नुपर्नेमा जोड दिँदै यसका लागि अजरवैजानले गर्दै आएको अगुवाइप्रति धन्यवाद दिए। उनले हिमालदेखि समुद्रसम्मको अवधारणमा ठुला मुलुकलाई पनि ध्यानाकर्षित गराउँदै असंलग्न राष्ट्रहरूले साझा प्रयास चाल्नुपर्ने बताए। सगरमाथा संवादका लागि नेपाल आएका विशेष प्रतिनिधि बाबायेभले नेपालले हिमालको रक्षा र वातावरणीय सुरक्षाका लागि गरेको सगरमाथा संवादका लागि बधाई दिँदै यसका सन्देशहरू विश्व समुदायसमक्ष पुर्याउने बताए।
बिएल संवाददाता - काठमाडौं
प्रधानमन्त्री केपी शर्मा ओलीले सुशासन र विकासको बाटोमा मुलुकलाई तीव्र गतिमा अघि बढाउन एमालेको बहुमतको सरकार चाहिने बताएका छन्। राष्ट्रिय युवा सङ्घ नेपालको केन्द्रीय शिक्षा विभागद्वारा आज एमाले पार्टी कार्यालय, च्यासलमा आयोजित कार्यक्रमा बोल्दै उनले देशलाई बिगार्न नदिन र बिना व्यवधान सुशासनलाई तीव्र गतिले अगाडि बढाउन एमालेलाई बहुमतको सरकारका चाहिने बताएका हुन्। ‘मुलुकका लागि एमालेको नेतृत्व आवश्यक रहेको बुझ्न हामीले ढिलो गर्यौं। अब त्यो भ्रममा रहनु हुँदैन। साना साना स्वार्थ लिएकाहरूले हामी विरुद्ध भ्रम फिँजाएका छन्। त्यस्तो भ्रममा पर्नु हुँदैन। एमालेलाई आगामी निर्वाचनमा बहुमत दिन युवाहरूले साथ दिनुपर्छ,’ ओलीले भने, ‘म युवाहरूलाई एमालेमा आउनुस् एकै पटक एमालेको अध्यक्ष बनिहाल्नोस् भनेर उल्काउन चाहान्नँ। आउनुस्, काम र अनुभव हासिल गर्दै नेतृत्वमा पुग्न सकिन्छ। मेसी, एम्बापे पनि एकै दिन बनेका होइनन्। रहर लागेर तुरुन्तै डाक्टर, इञ्जिनियर हुँदैनन्। मेहनत र समय आवश्यक हुन्छ। यो वास्तविकता तपाईँहरूले बुझ्नुपर्छ।’
बिएल संवाददाता - काठमाडौं
नेकपा (माओवादी केन्द्र)का अध्यक्ष पुष्पकमल दाहाल प्रचण्डले पश्चिम सेती जलविद्युत परियोजनालाई अगाडि बढाउने काम आफ्नो पार्टीले गरेको बताएका छन्। ‘जनतासँग माओवादी-मध्यपहाडी लोकमार्ग जनजागरण अभियान’ का क्रममा डोटीको दीपायलमा आयोजित भव्य जनसभामा बोल्दै उनले पश्चिम सेती जलविद्युत परियोजनालाई अगाडि बढाउने काम आफ्नो नेतृत्वमा भएको भन्दै त्यसप्रति आफू गम्भीर रहेको बताएका हुन्। ‘यो क्षेत्रको आर्थिक विकासका निम्ति ठुलो परियोजनाको रुपमा रहेको पश्चिम सेती जलविद्युत परियोजना झण्डै साढे सात सय मेगावटको परियोजना हाम्रै पार्टीका उर्जामन्त्री पोष्टबहादुर बोगटी हुनुभएको बेलामा भएको हो। सेती परियोजनालाई अगाडि बढाउन चिनियाँ कम्पनीसँग पनि उहाँले सम्झौता गर्नुभएको थियो। तर त्यो पछि रद्ध गरियो। पश्चिम सेती जलविद्युत परियोजना अगाडि बढाउन हाम्रो पार्टी गम्भीर छ। त्यसलाई कुनै न कुनैरुपले सम्पन्न गर्नुपर्छ भन्नेमा हामी प्रष्ट छौ,’ उनले भने। त्यस्तै प्रचण्डले आफू पहिलो पटक प्रधानमन्त्री हुँदा लोकमार्गको प्रस्ताव अघि सारेको बताए।
बिएल संवाददाता - डोटी
काभ्रेको धुलिखेल नगरपालिका-७ जिल्ला प्रशासन कार्यालय अगाडि विद्युतको पोलमा करेन्ट लागेर प्राधिकरणका एक मजदुरको ज्यान गएको छ। मृत्यु हुनेमा सर्लाहीको ईश्वरपुरन नगरपालिकाका-१२ घारिबथानका २८ वर्षीय उपेश नेपाली रहेका प्रहरीले जनाएको छ। ११ हजार भोल्टको हाइटेन्सन लाइनको पोलमा चढेर काम गरिरहेको अवस्थामा विद्युत प्राधिकरणले सूचनाविनै लाइन छाड्दा उपेशको करेन्ट लागेर ज्यान गएको जिल्ला प्रहरी कार्यालय काभ्रेका सूचना अधिकारी डीएसपी मिन घलेले बताए। विद्युत प्राधिकरणकै लापरबाहीले एक मजदुरको ज्यान गएको स्थानीयवासीले आरोप लगाएका छन्। शुक्रबार मात्रै प्राधिकरणको काभ्रे वितरण केन्द्रले एक सूचना जारी गर्दै त्यस क्षेत्रमा ११ केभी लाइन चार्ज गरिने जनाएको थियो।
बिएल संवाददाता - काभ्रे
कांग्रेस सभापति शेरबहादुर देउवाले आफ्नो पार्टी सबैभन्दा ठूलो भएपनि बहुमत नहुँदा मिलेर सरकारमा जानुपर्ने बाध्यता रहेको बताएका छन्। शनिबार प्रजातान्त्रिक विचार समाजले काठमाडौंमा आयोजना गरेको कार्यक्रममा बोल्दै देउवाले अहिलेको प्रणालीमा कुनै पनि दलको बहुमत आउन गाह्रो हुने भएकाले मिलेर सरकार बनाउनुपर्ने र मिलेरै चुनाव लड्नुपर्ने बाध्यता रहेको बताए। उनले वर्तमान सरकारका केही कमीकमजोरी भए सुधार गर्दै अघि बढ्ने पनि बताए। त्यस्तै उनले ०४८ सालमा कांग्रेस नेतृत्वको सरकार बनेपछि देशमा विकासका धेरै कामहरू भएको दाबी गरे। मुलुक अहिले पनि विकासकै बाटोमा हिडिरहेको उनको भनाइ छ।
बिएल संवाददाता - काठमाडौं
नेकपा (एकीकृत समाजवादी)का अध्यक्ष माधव नेपालले विगतमा वामपन्थी र दक्षिणपन्थी विचार बोकेकाहरू मिलेर नै आन्दोलनहरू सफल भएको बताएका छन्। शनिबार ३२ औँ मदन-आश्रित स्मृति दिवसको अवसरमा आयोजित कार्यक्रममा बोल्दै उनले देशको परिस्थिति अनुरुप कांग्रेस र कम्युनिष्ट मिल्नुपर्ने बताएका हुन्। उनले जनताको विश्वास अनुरुप काम गर्नुपर्ने भन्दै सबै एकतावद्ध भएर काम गर्नुपर्ने बताए। उनले भने,‘कमरेड पुष्पलालले भन्नुभएको थियो- जबसम्म यहाँ नेपाली कांग्रेस र कम्युनिष्ट पार्टीले हातेमालो गदैनन्, निरङ्कुस राजतन्त्रलाई पञ्चायती तानाशाहीलाई पराजित गर्न सकिँदैन। यो विचारलाई कांग्रेसका नेता बीपी कोइरालाले अस्वीकार गरेका थिए। फलस्वरुप बीपी बाचुन्जेलसम्म नेपाली कांग्रेसबाट एक्लै आन्दोलन सफल भएन। पछिल्लो ०६२/६३ बामपन्थी र दक्षिणपन्थी विचार बोकेर पनि देशको परिस्थितीमा निरङ्कुश राजतन्त्रको विरुद्धमा जुध्ने मानसिकताले दुईले हातेमालो गरे र राजतन्त्रको अन्त्य पनि भयो। यो वास्तविकतालाई सबैले महसुस गर्नुपर्छ। किताबको पाना पल्टाएर होइन देशको परिस्थिती अनुसार अगाडि बढ्नुपर्छ।’
बिएल संवाददाता - काठमाडौं
गृहमन्त्री रमेश लेखक शनिबार सगरमाथा आधार शिविर (बेसक्याम्प) क्षेत्रको निरीक्षण भ्रमणमा पुगेका छन्। पर्यटकीय सिजनको सन्दर्भमा आरोहीहरूको अवस्थाबारे प्रत्यक्ष जानकारी लिन र शान्ति सुरक्षासम्बन्धी अवस्था अवलोकन गर्न उनी खुम्बु पासाङल्हामु गाउँपालिका-४ स्थित सगरमाथा आधारशिविर पुगेका हुन्। सो क्रममा गृहमन्त्री लेखकले सरकारले सगरमाथा क्षेत्रमा उद्धार, पर्वतारोहण सहयोग र पर्यटकहरूको सहजताका लागि निर्वाध रूपमा हेलिकप्टर उड्ने वातावरण सिर्जना गर्न तत्पर रहेको बताए। उनले शारीरिक रूपमा कमजोर वा दुर्घटनामा परेका पर्यटकको उद्धारका लागि हेलिकप्टर अत्यावश्यक रहेको उल्लेख गर्दै, सरकारको नीति यस्तो सेवालाई सहज बनाउने दिशामा केन्द्रीत हुने स्पष्ट पारे।
बिएल संवाददाता - काठमाडौं
नेपाली कांग्रेसले संसदीय दलको बैठक बोलाएको छ। सभापति देउवाले शनिबार दिउँसो २ बजे संसद भवनको ल्होत्से हलमा बस्ने गरी संसदीय दलको बैठक बोलाएका हुन्। बैठकमा आगामी आर्थिक वर्षको बजेटका साथै समसामयिक राजनीतिक विषयमा छलफल हुने बताइएको छ।
बिएल संवाददाता - काठमाडौं
इजरायली सेनाले गत बिहीबारदेखि भयानक आक्रमण गरिरहेको छ। शनिबारसम्मका यस्तो आक्रमणमा लगभग २ सयभन्दा धेरै मानिसको मृत्यु भइसकेको छ। इजरायलले हमासविरुद्ध भन्दै अस्पताल र विद्यालयहरूमाथि आक्रमण गरिरहेको छ। गाजापट्टीलाई नियन्त्रणमा लिएरै छोड्ने रणनीतिका साथ इजरायलले कतिपय ठाउँमा आफ्ना सैनिकहरू पनि तैनाथ गरिसकेको छ। इजरायली सैनिकले उत्तरी गाजा क्षेत्रमा केही पर्चाहरू पनि फ्याँकेको छ जसमा प्यालेस्टाइनीहरूलाई उक्त क्षेत्र छोड्न भनिएको छ।
बिएल संवाददाता - काठमाडौँ
उनले आफूहरुले शक्तिका स्रोत जनता नै हुन् भन्ने मान्यताका साथ जनताको शासन कायम गर्न खोजेको भन्दै देशभक्ति, राष्ट्रिय स्वाधीनता र राष्ट्रिय अखण्डताको मार्गलाई आफूहरुले कहिल्यै नछोडेको बताए। उनले आफ्नो नेतृत्वमा सरकार रहेकाले राजतन्त्र फर्काउने प्रतिगमनको प्रयास असम्भव र अस्वीकार्य भएको पनि बताए।
बिएल संवाददाता - काठमाडौँ
बैठकपछि युक्रेनका रक्षामन्त्री रुस्तम उमेरोवले दुबै देशले पहिलो चरणमा एक-एक हजार युद्धबन्दीहरू रिहा गर्नेछन्। ‘हामीले युद्धबिराम र युद्धबन्दीहरू रिहा गर्ने विषयमा छलफल गरेका छौं। पहिलो चरणमा एक एक हजार युद्धबन्दीहरू रिहा गर्ने सहमति भएको छ’ उनले भनेका छन्। यो बैठकमा युक्रेनी प्रतिनिधिले दुबै देशका राष्ट्रहरूबीच सिधा वार्ताको प्रस्ताव गरेका थिए। रुसका प्रतिनिधिहरूले त्यो कुरा आफ्ना राष्ट्रपतिलाई सुनाउने बाचा पनि गरेका छन्।
बिएल संवाददाता - काठमाडौँ
सर्वोच्च अदालतले राप्रपा वरिष्ठ उपाध्यक्ष रवीन्द्र मिश्रलाई थुनामुक्त गर्न आदेश दिएको छ। मिश्र पत्नी सारिका कार्कीले दायर गरेको बन्दी प्रत्यक्षीकरण रिटमा सुनुवाइ गर्दै शुक्रबार न्यायाधीशद्वय तीलप्रसाद श्रेष्ठ र कुमार चुडालको संयुक्त इजलासले मिश्रलाई थुनामुक्त गर्न आदेश दिएको हो। योसँगै मिश्र आजै रिहा हुने भएका छन्।
बिएल संवाददाता - काठमाडौं
नेकपा (माओवादी केन्द्र)का उपमहासचिव जनार्दन शर्मा कांग्रेस सभापति शेरबहादुर देउवालाई भेट्न पुगेका छन्। शर्मा शुक्रबार दिउँसो देउवालाई भेट्न उनको निवासमा पुगेका थिए। भेटबारे शर्माले सामाजिक सञ्जालमार्फत जानकारी गराएका छन्। उनले भेटमा समसामयिक राजनीतिक परिस्थितिका विषयमा कुराकानी भएको बताएका छन्। उनले भनेका छन्, ‘पूर्वप्रधानमन्त्री तथा नेपाली कांग्रेसका सभापति शेरबहादुर देउवासँग देशको समसामयिक राजनीतिक परिस्थितिबारे छलफल।’ आज बिहान मात्रै माओवादी केन्द्रका अध्यक्ष प्रचण्डले देउवालाई डडेलधुराबाटै फोन गरेका थिए।
बिएल संवाददाता - काठमाडौं
द्वन्द्वपीडित समूदायले संक्रमणकालीन न्याय सम्बन्धी आयोगहरूमा पदाधिकारीहरू नियुक्तिमा असहमति जनाएका छन्। शुक्रबार काठमाडौंमा द्वन्द्व पीडित महिला राष्ट्रिय सञ्जाल, द्वन्द्व पीडित साझा चौतारी, वेपत्ता परिवार समाज नेपाल, द्वन्द्व पीडित साझा चौतारीलगायतले संयुक्त पत्रकार सम्मेलन गर्दै आफूहरूसँग परामर्श नै नगरि आयोगमा अपारदर्शी, स्वेच्छाचारी, अविश्वसनीय, निर्देशीत र दलीय भागवण्डाका आधारमा पदाधिकारी छनौट गरिएको भन्दै आपत्ति जनाएको हो। पीडितहरूको दबाबका बावजुद सरकारले संक्रमणकालीन न्यायसम्बन्धी दुई आयोगमा सत्तारुढ दलहरूले अघि बढाएको भागबण्डा अनुरूप नियुक्ति प्रक्रिया अगाडि बढाइसकेको उनीहरुको भनाइ छ। सोही क्रममा द्वन्द्वपीडित साझा चौतारीका संस्थापक अध्यक्ष सुमन अधिकारीले पीडितका सवाललाई हलुका तरिकाले नलिन राज्यलाई खबरदारी गरेका छन्।
बिएल संवाददाता - काठमाडौं
नेपाल विद्युत प्राधिकरणका कार्यकारी निर्देशक हितेन्द्रदेव शाक्यले बिहीबार बेलुका विद्युत आपुर्तिमा देखिएको समस्यालाई लोडसेडिङसँग जोडेर सामाजिक सञ्जालमा आएको अभिव्यक्तिप्रति आपत्ति जनाएका छन्। शुक्रबार पत्रकार सम्मेलन आयोजना गर्दै उनले प्राविधिक समस्याका कारण सिर्जना भएको प्रतिकुल अवस्थालाई लोडसेडिङसँग जोडेर ‘अब इन्भर्टर र मैनबत्तीका दिन आए’ भन्दै सामाजिक संजालमा अभिव्यक्त भनाइप्रति कतिपनि सत्यता नरहेको दाबी गरे। उनले भने, ‘मौसमजन्य गतिविधिका कारण विद्युतीय संरचनामा भएको क्षति तथा देखिएको प्राविधिक समस्याका कारण सिर्जना भएको प्रतिकुल अवस्थालाई लोडसेडिङसँग जोडेर अब इन्भर्टर र मैनबत्तीको दिन आए भन्दै सामाजिक संजालमा अभिव्यक्त भनाइप्रति कत्तिपनि सत्यता छैन र अब नेपालमा पुनः लोडसेडिङ शुरु हुने दिन आउँदै नआउने कुरा आम उपभोक्तालाई जानकारी गराउछौं।’
बिएल संवाददाता - काठमाडौं
हुलाकी सडक नेपालगन्जका प्रमुख लिलाबहादुर भण्डारीविरुद्ध अख्तियार दुरुपयोग अनुसन्धान आयोगमा उजुरी परेको छ। भण्डारीले आफ्नो सरकारी हैसियत दुरुपयोग गरी विभिन्न ठेक्कापट्टामा भ्रष्टाचारजन्य कार्यगरी अकुत सम्पति कमाई भष्टाचार निवारण ऐन २०५९ को गम्भीर उल्लंघन गरेको आरोप लगाउँदै डिल्लीराम खनालले अख्तियारमा उजुरी दिएका हुन्। विभिन्न सडक आयोजनाहरूको गुणस्तर र परिणाम कायम नगरी ठेकेदारसँगको मिलेमतोमा ठेक्का सम्झौता भन्दा बढी भुक्तानी दिएको, सडक निमार्ण नै नगरी रकम भुक्तानी दिएबापत घुस लिइ भ्रष्टाचारजन्य गरेकोमा उनीविरुद्ध यसअघि नै अख्तियारमा उजुरी परेको थियो। उक्त उजुरीमाथि हालसम्म छानबिन नगरिएको खनालको उजुरीमा उल्लेख छ। प्रमुख भण्डारीविरुद्ध निर्माण कम्पनीसँगको मिलेमतोमा गैरकानुनी ठेक्का लगाइ भ्रष्टाचार गरेको आरोप लगाइएको छ।
बिएल संवाददाता - काठमाडौं
नेकपा (माओवादी केन्द्र)का अध्यक्ष पुष्पकमल दाहाल (प्रचण्ड)ले तत्काल एमालेसँग मिलेर बाम एकता सम्भव नरहेको टिप्पणी गरेका छन्। शुक्रबारबाट पार्टीले सुरु गर्न लागेको मध्यपहाडी लोकमार्ग अभियान सुभारम्भका लागि डडेलधुरा पुगेका प्रचण्डले अहिले तत्काल र ०८४ को चुनावसम्म पनि वामपन्थी एकताको सम्भावना नरहेको बताए। उनले आफूले यो कुरा एमाले अध्यक्ष केपी शर्मा ओलीलाई पनि भनेको जिकीर गरे। उनले भने, ‘हामीले पहिलै वामपन्थी एकता होस् भनेर चाहना राखेकै हो, प्रस्ताव गरेको पनि हो, एकता भएको पनि हो तर त्यो तोडियो। फेरि पनि एकचोटी हुन्छ त भनेर बल गरेको हो तर नराम्रोसँग धोका खाइयो, पार्टीले मात्र होइन, नेपाली जनतालाई पनि धोका भयो, त्यसकारण इनफ इज एनफ।’
बिएल संवाददाता - डडेल्धुरा
नेकपा (माओवादी केन्द्र)का अध्यक्ष पुष्पकमल दाहाल (प्रचण्ड)ले डडेलधुराबाट नेपाली कांग्रेसका सभापति शेरबहादुर देउवालाई फोन गरेका छन्। शुक्रबारबाट पार्टीले सुरु गर्न लागेको मध्यपहाडी लोकमार्ग अभियान सुभारम्भका लागि डडेलधुरा पुगेका प्रचण्डले त्यहीँबाट फोन गरेका उनको सचिवालयले बताएको छ। प्रचण्ड स्वयंले पनि देउवालाई फोन गरेको पुष्टि गरेका छन्। प्रेस सेन्टर डडेल्धुराले आयोजना गरेको पत्रकार सम्मेलनमा बोल्दै प्रचण्डले देउवालाई आफूले डडेलधुरा आइपुगेको जानकारी गराएको र देउवाले स्वागत गरेको बताए। ‘म यहाँ बस्दै गर्दा, यो अब शेरबहादुर देउवाजीको जिल्ला भनेर पनि चिनिन्छ। देउवाजीसँग पनि सम्पर्क भयो र उहाँले पनि मेरो जिल्लामा स्वागत भन्नुभयो, डडेलधरामा स्वागत भन्नुभएको छ।’
बिएल संवाददाता - काठमाडौं
राष्ट्रिय प्रजातन्त्र पार्टीका अध्यक्ष राजेन्द्र लिङदेनले राजसंस्था र हिन्दुराज्यमा आस्था राखेकै कारण दण्ड भोग्नुपर्ने भए सरकारविरुद्ध विद्रोहमा जान र जङ्गल पस्न भन्नुपर्ने बताएका छन्। शुक्रबार प्रतिनिधि सभा बैठकमा बोल्दै उनले देशमा ‘सुशासन हुनुपर्छ, भ्रष्टाचार गर्नेहरू दण्डित हुनुपर्छ’ भन्दै आवाज उठाउनेलाई प्रताणित गरेको आरोप लगाए। ‘आस्थाकै आधारले एकपछि अर्कोगरी अनेक बहानाले पक्राउ गर्दै लाने हो भने म प्रधानमन्त्री, गृहमन्त्री र सिंगो सरकारलाई भन्न चाहन्छु यसरी निषेध गरेर लाने भए औपचारिक रुपमै सरकारले भन्दियोस् हामी विद्रोहमा जाऔं। राप्रपा लगायत हिन्दुराज्य, राजसंस्था मान्छु भन्नेहरूले संघीयता मान्दिन, प्रदेश मान्दिन भन्नेहरू देशमा सुशासन हुनुपर्छ, भष्ट्राचार गर्नेलाई दण्डित हुनुपर्छ भन्नेहरू यसरी प्रताणित हुनुपर्छ भने विद्रोहमा जान्छौं। विद्रोहमा जाऔं, जङ्गल पस भन्नुपर्यो,’ उनले भने।
बिएल संवाददाता - काठमाडौं
१ .
२ .
३ .
४ .
५ .
